中年好聲音4｜谷婭溦退出傳與海兒不和　當事人：真係好神奇

TVB選秀節目《中年好聲音4》賽事已經進入白熱化階段，餘下24強學員正全力衝擊最終的「王者寶座」，偏偏呢個關鍵時刻，就傳出擔任節目評審之一的谷婭溦退出評審團的消息。

消息一出，外界即刻湧現唔少猜測同揣測。當中鄧兆尊早前就喺個人YouTube頻道《娛樂好好玩》中，疑似針對呢件事爆料：「資本方出錢話事㗎嘛，有啲可能資本方覺得，呢個女仔比較有啲問題出現咗，可唔可以搵個人頂一頂佢，呢個情形發生係有可能嘅。」

今日（12/4），同為節目評審的周國豐、海兒，聯同24強參賽者一同出席《中年好聲音》商場見面會，二人接受傳媒訪問時，正式回應了谷婭溦退出評審團的相關傳聞。

周國豐當場笑住開玩笑：「谷婭溦嘅事要問返佢（海兒）先至啱㗎嘛，而家傳佢哋兩個不和吖嘛，哈哈哈。」

對此海兒就回應：「我係當事人，講咩都冇乜公信力，但係真係好神奇，每次錄影我哋唔係傾化妝，就係傾平時做啲乜，再唔係就傾唱歌，所以我頭先都話，不如問返監製或者周Sir。」

周國豐隨即幫口澄清：「我覺得呢啲傳聞，無論對溦溦定係海兒都有啲唔公平，佢哋兩個平時傾偈傾得好埋㗎。所以我睇到新聞話佢哋兩個不和？一開始新聞仲冇指名道姓，只係話有個靚女評審，我仲諗唔通係肥媽？哈哈哈。我想強調一樣嘢，唔係為自己辯護，成個節目入面，評審之間嘅關係全部都好好，好close。」

講返谷婭溦今次退出的消息，周國豐同海兒都坦言，自己都覺得相當突然。被問到接任評審的人選安排，周國豐就爆料指，下星期就會錄影新一集節目，到時大家自然就會知道新評審係邊位。

至於鄧兆尊早前爆料，暗示谷婭溦退出係因為資方有意見，周國豐同海兒都齊齊表示：「呢個真係唔知喎。」

海兒亦都補充，大讚谷婭溦對節目絕對出心出力：「而家真係咩謠言都有。同埋溦溦嘅工作的確好忙，佢真係好辛苦，成日喺內地拍嘢拍到凌晨三、四點，搭車返嚟香港又要由頭開始化妝錄影，錄完又要即刻飛返內地繼續工作，真係好似燃燒生命咁去做。」

另外，提到張敬軒早前unfollow咗唔少圈中好友，同屬英皇娛樂的海兒就表示自己唔清楚詳情：「呢個我又唔係好清楚，因為平時都係日日忙住工作。（被問到同軒仔熟唔熟？）唔⋯⋯睇吓你點定義熟唔熟啦，我有同佢同台演出過，呢件事都係留返公司回應啦。」

TVB