女神配對計劃2｜林盛斌爆有新玩法 江美儀睇好怕羞仔地產經紀. 無綫戀愛真人騷《女神配對計劃2》為五位女神何沛珈、陳若思、俞可程、阮嘉敏及郭珮文配對「求愛勇者」，昨日（18日）有10位勇者會見傳媒，當中不乏優質荀盤，包括34歲、擁四間金融科技公司、年收過百萬嘅林福明；36歲地產經紀兼前足球員劉梓堅；以及最矚目嘅19歲乒乓球教練蔡楠，佢嘅心儀女神竟然係TVB高層樂易玲。

主持林盛斌（Bob）同「花生團」江美儀接受《香港01》訪問，對於19歲參賽者，江美儀話：「當開吓眼界，上得鏡可能有人話我啱喎。」Bob就話：「對男仔嚟講，成功配對到梗係好，但冇嘅話佢自己都會膽大咗。」提到蔡楠鍾意樂小姐，Bob笑言：「有咩問題？個個都鍾意㗎，結咗婚之嘛。」講到年齡差距，Bob話：「相差太遠默契上未必配對到，但十年八年唔係問題。」

江美儀透露，36歲地產經紀「兔仔」劉梓堅畀佢印象唔錯：「陽光，好笑容，有少少怕羞，呢啲好好。」Bob就話想了解多啲擁幾間公司嘅林福明：「幾百萬一年……我都想幫啲女神問佢收入幾多，點解仲未搵到女朋友。」

Bob同江美儀又透露今輯玩法有改變。Bob話上一輯有勇者為咗追女神，半被迫入另一組，浪費時間，今次賽制會調整，希望更公平。另外Bob提到男嘉賓報名到5月31日截止，有興趣嘅男士仲有機會。TVB