陳煒朱晨麗姊妹情深 陳煒爆朱朱傳統到唔雪卵：要自然受孕！. 陳煒（煒哥）同朱晨麗（朱朱）8年前因合作《多功能老婆》結緣，成為圈中出名嘅好姊妹。兩位選美冠軍出身，雖然人生經歷唔同，但同樣「骨子裏藏男子漢性格」，從未試過鬧交。近日二人接受專訪，大談姊妹情、感情觀，煒哥更爆朱朱為咗將來生育，嚴控飲食，仲傳統到唔考慮雪卵，堅持要自然受孕！

煒哥同朱朱私下感情好到老公都似親兄妹。煒哥話老公每次見到朱朱有事，都會自動波幫手。朱朱亦坦言好羨慕煒哥搵到好老公：「未見過一個老公咁支持老婆事業，每次煒哥有新劇，佢先生一定喺通訊軟件群發宣傳，叫大家支持，真係冧爆！」

講到朱朱嘅感情狀況，煒哥笑言手頭上冇「筍盤」介紹：「我老公啲朋友個個都結晒婚，我班朋友朱朱都識晒，唔啱都冇計。」不過煒哥感性話：「成功同失敗嘅感情我都經歷過，多對眼同多把口應該幫到忙，點都畀到啲提點啩！」

朱朱自認單身，擇偶條件只係要健康嘅異性，又話遇到啱嘅一定唔收埋，希望有生之年可以經歷婚姻。佢更自爆成日做身體檢查，醫生話佢狀況比實際年齡還好，生育冇問題，仲多謝煒哥成日請食燕窩花膠幫佢凍齡。煒哥就爆料：「有次約佢食飯，話不如食日本嘢，佢即刻拒絕，原因係覺得魚生可能受污染，驚賀爾蒙失調影響日後生育。」問到有冇考慮雪卵？煒哥笑言：「佢就係傳統到要自然受孕呀！」令人忍俊不禁。

朱朱又大讚煒哥好窩心，舊年佢生日唔喺香港，隔咗成個月班朋友約食飯，佢以為幫其中一個慶生，點知蛋糕寫住佢個名，煒哥仲捧住花束出嚟送畀佢，令佢非常感動。煒哥就話：「見證住佢拍拖、結婚、生仔，會係我嘅任務，我會繼續喺佢身邊支持佢。」姊妹情深，認真羨煞旁人。TVB