【娛樂新聞】陳瀅派泳衣福利滿意身形 漏口風爆周嘉洛將入劇組.陳瀅今日（12日）到旺角出席「機動狂熱 x 港式情懷」宣傳活動。佢早前派泳衣福利，透露因為去泰國工作時有一日假期，喺酒店游水時影相，冇刻意修身減磅，現時每星期做兩次運動，對身形好滿意。繼泰國後，佢去咗阿姆斯特丹旅行兩星期，因為踩單車技術一般，最深刻就係喺當地踩單車遊覽同逛特色市集。

早前出席JW生日會後被指飲醉倒地，陳瀅解釋話標題錯咗，自己冇飲醉，只係送咗一份親手寫嘅「劇本殺」遊戲做生日禮物。佢當晚扮演被毒死嘅死者，飲毒酒後倒地，兇手就係JW。陳瀅話朋友之前搵人寫劇本殺收費過萬，所以打算遲啲朋友生日再寫劇本，仲呼籲大家可以搵佢寫劇本殺，收平啲。佢話今次劇本殺好成功，因為JW、朱敏瀚、羅天宇同周嘉洛都鍾意演戲，大家玩得好開心。

講到周嘉洛唔使再拍《愛回家》，係咪可以約出去玩？陳瀅透露周嘉洛快將入劇組，隨即被追問點解咁清楚，佢即時補充：「我不是絕對清楚知道。」而佢自己就九月先拍劇，即係仲有大量時間去玩，佢尷尬話只係工作與生活平衡啫。今年冇出席樂易玲生日會，但陳瀅話舊年有去，都有送禮，得知有禮物失竊時反問：「唔係偷咗我嗰份嘛？」知道係花束被偷，佢估計因為樂小姐收咗幾十紮花，可能係工作人員幫手拎走。TVB