【娛樂新聞】《2026香港小姐競選》從化外景拍攝 麥美恩率12佳麗稻田取景 笑言「龍躉村姑」無人能及.《2026香港小姐競選》12位候選佳麗今日（12日）在師姐麥美恩帶領下，於廣州從化展開外景拍攝。傍晚時分，眾人換上洋裝，在米埗村溫泉民宿前嘅大片稻田美景前取景。麥美恩笑言今次拍攝令佢憶起當年參選時到台灣農田採茶嘅情景，同樣身水身汗。佢話：「我哋冇論資排輩，齊上齊落，錯誤示範就交畀我啦！」滿身大汗嘅佢笑言汗水唔會白流，最重要有工開。

麥美恩指每次參與港姐節目都會做足功課，除咗公開資料，仲會睇佳麗嘅深入問卷，了解佢哋嘅性格同潛能。佢大讚佳麗已準備好比賽，比自己當年準備得更充足，又重提自己有「龍躉村姑」外號：「咁多年冇人可以頂我呢個稱號，但龍躉總會變美人魚，佢哋已經係美人魚，唔需要呢個蛻變。」

提到聽日泳裝拍攝，麥美恩笑言自己已練好腹肌，隨時準備騷身材。佢覺得佳麗們相對文靜，希望大家放膽展現活潑一面，又話「癲超越唔到我啦」，更搞笑話想睇佳麗「鬆踭」重現經典畫面。對於佳麗讚佢口才轉數快，佢笑稱自己唔係評判，唔使擦鞋，會盡力協助師妹，希望佢哋唔好吝嗇發問機會。TVB