【明周】北上歎世界 食飯時間見陳豪

撰文：娛樂阿審攝影：圖片及資料由筆者提供

《企業強人》

這年頭每逢星期五晚，阿審身邊的同事或親友，總是行色匆匆趕住走。去邊？當然是趕住過關北上。的而且確，高鐵超級方便，去深圳、珠海、中山、廣州、惠州、佛山話咁快就到，老友最近說要去遠些少，原來肇慶都交通方便好好玩。

阿審不太喜歡人趕自己又趕，高鐵三十分鐘上車入閘的時限會令人神經緊張，所以一定在星期六瞓醒才約朋友港車北上，輕輕鬆鬆落車行過關口。第一件事首先去歎個環境舒適價錢實際的中午茶，但有時為了做頭療或按摩，就會在附近吃個美味Bagel才開始一天的療癒，放鬆身心。

阿審自小掛在口邊的一句話 ―― 女人一定要善待自己，好好愛自己！所以好多時都是和一班女人進行心貼心的充電之旅，由頭到腳疼錫完自己之後，過夜與否都一定要和閨蜜吃個美味晚餐。

上星期就吃了一頓精采晚餐，侍應每上一道菜，大家都為擺盤精美而哇哇聲，紛紛舉機拍照。阿審才不跟姊妹瘋，第一時間開着房間的大電視，睇吓內地電視台播什麼？電視劇送飯是阿審的日常，冇得輸。轉到深圳衞視台，原來正在播放TVB的劇集《企業強人》。阿審即時眼前一亮，在深圳吃飯也可以睇到港劇。阿審跑新聞年代都不時返內地做採訪，最討厭是不停見到被插播當地廣告，再好的內容都睇到非常冇癮，索性唔睇算數。但近年情況已經得到完善，阿審可以在深圳的黃金時段一邊吃飯一邊睇這部港劇味濃的《企業強人》，真的是意外驚喜。因為沒有插播，所以睇得特別爽和痛快。

阿審返港後，即刻搵相熟公關八卦一下。傾落先知，《企業強人》今次登陸深圳衞視，原來幾有代表性：它是 CEPA 補充協議落地後，首部打入內地衞視黃金時段的港劇，加上適逢香港回歸祖國二十九周年，意義自然同一般劇集播出有點不同。

TVB正式走入內地電視

阿審在小紅書見到最新「戰報」，一望《企業強人》黃金檔成績，的確有點驚喜。港劇北上早已不只在網絡平台累積點擊，而是開始真正走入內地千家萬戶的電視屏幕。網絡熱度固然重要，但省級衞視黃金時段競爭激烈，要在全國眾多劇集之中突圍，絕非易事。《企業強人》今次單集收視峰值達0.692%，單集最高排名打入全國前三，單日同時段最高亦排到全國第四，成績相當不俗。作為首部登上內地衞視黃金時段的香港商戰劇，《企業強人》今次播出，既讓港劇接觸到更廣泛的大灣區觀眾，港劇終於可以正式走進內地衛視黃金時段，同時說明了香港和內地的文化深度融合，只要是好故事就能打破界限。

《企業強人》於小紅書上評價不錯

市場上講港劇登陸內地衞視，阿審聽咗好耐，還以為又是得個講字。點知今次人在深圳，隨手開着電視，真的在播TVB《企業強人》。常說大灣區融合有幾多紅利，阿審暫時未見到自己個銀行戶口有咩變化，反而最實際的「紅利」，就是身處深圳都可以看到這齣港劇，無一刀斬的插播廣告。阿審返內地見到好多進步，而這個就是最貼近阿審利益的所有，樸實無華。