【娛樂新聞】朱千雪陀B七個月瞞老公着高踭鞋 鼓勵港姐季軍李澤欣：季軍好嘢嚟㗎.懷有第二胎嘅朱千雪（Tracy）今日（1日）以一身鮮紅連身裙現身乳酪品牌活動，雖然腹大便便，但依然貪靚腳踏高跟涼鞋，全程笑容滿面，精神爽利。佢接受《香港01》訪問時透露，老公未知佢着高踭鞋，但強調非常安全。

適逢開學日，朱千雪直言行程緊湊，清早做運動後送兩歲大仔返學，隨後去髮型屋準備，活動後仲要接仔仔上課外活動。佢笑言送仔仔返學時「講咗句掰掰就走咗」，未有唔捨得，但知道仔仔需要適應新學校。講到老公吳昆倫（Justin），佢大讚係「神隊友」，老公好享受湊仔，更對第二胎來臨好開心，笑言「可以返學前班啦」。不過朱千雪坦言兩個就夠，唔打算生第三個。

作為「民選港姐」出身，朱千雪表示有留意今屆港姐決賽，心水係冠軍袁絲珩同季軍李澤欣。對於李澤欣失落冠軍後嘅言論同落淚引起爭議，有網民叫佢「學吓人哋朱千雪」，朱千雪就以過來人身份鼓勵師妹：「我都係季軍，季軍好嘢嚟㗎，有前途㗎。我覺得佢當晚表現好，亦都攞到獎，已經係超額完成。」佢又話每個新人都有言論壓力，最重要係做好自己，享受工作。TVB