【娛樂新聞】馬貫東首開腔回應與李家鼎關係 多謝前輩提點「少說話多做事」.馬貫東、陳曉華、吳若希、阮浩棕、韋家雄等今日（2日）為新劇《死有對証》宣傳，馬貫東首度開腔回應早前被指與李家鼎（鼎爺）有淵源嘅報道。佢表示新聞係前輩之間嘅私事，唔方便回應太多，但就透露剛入行時鼎爺曾以前輩身份叮囑佢「少說話多做事」，以及唔好怕蝕底，佢一直記住並從中吸收經驗。被問到關係曝光有冇帶來影響，馬貫東話影響不大：「行得、食得、玩得。」但佢強調唔知鼎爺身體狀況，二人亦冇聯絡，家人對事件有少少介意，但感嘆好多事控制唔到，希望隨時間過去。

劇集三年前拍攝，馬貫東首度擔正男一，與陳曉華演歡喜冤家。陳曉華透露劇中有強迫症，但現實中自己比較隨性，否認「哩啡」，不過當時較肥，因拍攝時冇節食同運動，加上低血糖要靠吳若希請食零食頂住。陳曉華又難忘飾演法醫解剖「遇害」嘅吳若希，坦言至今睇宣傳片都毛管戙，好彩入行前讀過護士有解剖學底子，對白反而冇難度，反而正在拍攝嘅《驅魔速遞》對白更難記。TVB