【娛樂新聞】黃翠如賴慰玲孫慧雪張慧儀分享湊仔經 蕭哈哈被星星拒絕幾次：食檸檬.黃翠如、賴慰玲、孫慧雪與張慧儀今日（2日）出席《健康誠諾書》記者會，三位媽媽聚首即傾不停。賴慰玲透露與翠如是街坊，拍劇時聽到蕭正楠問她周數便估到有喜，更見證整個過程。翠如誕B後，帶兩個月大細仔探對方，喺超市遇到會雙雙踎低同小朋友玩。孫慧雪就話三年冇返TVB，細仔多大就有多久，自己都有戲癮，隨時準備好返嚟拍劇。

三位媽媽共有五位兒子，話題甚至講到交女朋友，笑言拒做惡毒奶奶。翠如話蕭哈哈只有17個月大，但已經遇過感情問題：「哈哈同連詩雅囡囡星星一齊讀play group，哈哈好鍾意星星，不過星星鍾意大過佢嘅，所以被拒絕咗幾次，食檸檬！」講到蕭正楠做港姐司儀，翠如話有睇完比賽，讚三人表現好，主持功力已比她強。而蕭哈哈首次睇電視，見到爸爸同兩位「郁郁」喺電視出現感新奇。

賴慰玲憑《非常檢控觀》喺「亞洲影視內容大獎2026」獲「最佳女配角」，佢話未慶祝，等劇組台前幕後有空再請監製請食飯。講到請來張慧儀，因大家合作《女人俱樂部》相熟，知道Hanson曾面對健康問題，母子經歷好多，節目中一講到大家也眼淺。張慧儀話數年冇返TVB，知道兒子陪佢上節目時會驚，但仍陪伴是愛錫佢嘅表現。問怕羞難識女仔，佢笑言不急，若遇到個像自己一樣愛錫兒子嘅人，不介意多個囡。TVB