【娱乐新闻】莊思敏喪母後首露面哽咽談亡母 回應分享喪禮片被批博流量.莊思敏（Jacquelin）與莊思明的母親、莊門拿汀江玉珠夫人於8月下旬與世長辭，享年82歲。莊思敏日前在社交平台分享母親喪禮及設靈的影片與照片，引來部分網民質疑「連出殯都玩早拍晚播」，批評她利用母親喪禮「博流量」。莊思敏今日（5日）喪母後首度公開露面，出席時裝展活動，受訪時談及亡母仍難掩傷痛，數度哽咽落淚，並大方回應網民質疑。

莊思敏表示情緒已稍為平復，並開始重投工作：「好番啲啦，都叫平復咗啦，咁都要投入返工作。其實呢段時間情緒可能起伏會比較大啲，有時處理媽咪啲舊照片嘅時候，都有好多唔同嘅回憶浮返出嚟。」

她透露母親生前已患病一段時間，家人早有心理準備，最感欣慰的是母親臨終前並無承受太多痛苦，而且所有至親均隨侍在側：「喺我哋屋企人嚟講，其實大家都知道大慨會發生，所以唔算嚟得十分突然。我最緊要係佢冇痛苦，當時好彩、好感恩所有嘅屋企人都在身邊。我都未夢見過媽咪，我都好想可以夢見佢。」

對於在社交平台分享喪禮片段遭網民圍剿，質疑她「博流量」及「早拍晚播」，莊思敏坦言沒有為此感到不高興或介懷，並澄清該帳號只是個人紀錄生活的地方：「我又冇特別介懷嘅，因為一個用嚟分享我自己生活、想記錄我自己生活嘅帳號，當然公開帳號其他人會睇到，其他人有其他嘅諗法我係阻止唔到。我冇諗過個迴響係咁大，對於我嚟講，我只係想記錄住當刻嘅環境，因為現場好多親友都好有心送咗好多花過嚟，現場個佈置都係我相信我媽咪好鍾意嘅，所以只係想好好記錄一下。」

針對網民「早拍晚播」及質疑有專業團隊拍攝的指控，莊思敏親自解釋馬來西亞與香港喪禮習俗的分別：「其實唔係早拍晚播啦，亦都唔係來自任何嘅專業團隊，只係自己用手機好隨意咁拍下一些片段。喺馬來西亞個設靈方式同香港會有啲唔同，我哋個設靈時間會比較長，會擺兩日，第三日先舉辦出殯，所以時間上唔同。」

莊思敏最後提到，母親生前最希望看到子女們能夠好好生活，目前喪禮大部份儀式已圓滿完成，家人亦特別挑選了母親生前最愛的花卉及優雅風格佈置場地：「媽咪都係希望我哋可以好好生活，好好照顧自己。我覺得最緊要係我哋咁多個兄弟姊妹會繼續互相照顧。場地佈置我哋都加咗好多媽咪生前鍾意嘅花，儘量以比較高雅為主，都係媽咪比較鍾意嘅環境。」TVB