【娛樂新聞】《璀璨之城》張智霖狠心「弒父」推姜大衛落樓梯 毒舌狂言掀高潮 姜大衛親爆曾想親身上陣.熱播中嘅台慶劇《璀璨之城》，今晚（23日）焦點場口莫過於官孝賢（張智霖飾）狠心推父親官志琛（姜大衛飾）落樓梯，劇情令觀眾睇得心寒。

劇情講述孝賢與孝君（吳卓羲飾）不滿志琛奪去LKS首席區域總監之位，孝賢憤然搬離官家，並辭去尚利鋒聯席總裁職務，與秉麟（李成昌飾）成立「夢幻之城發展基金」對抗志琛。志琛則成立另一基金，公開宣稱注資一百億企圖反制。孝賢接觸海外投資者陳在碩（吳子冲飾），志琛暗中截胡搶先會面，但原來在碩係「空心老倌」，借志琛成立嘅基金進行商業詐騙，更被馬來西亞政府通緝。呢一切原來係孝賢與孝君暗中佈局，要在志琛最高峰時拉他「下馬」。

其後孝賢相約志琛在大潭山郊野公園見面，提出可幫他解決陳在碩嘅一百億問題，逼他交出公司股份，並不得再插手公司事務。老奸巨猾嘅志琛毫無懼色，連環狂飆毒舌金句，先話「冇我官志琛，你連做廢柴二世祖都冇機會」，再侮辱孝賢亡母：「我都唔知你阿媽點解會生出你咁嘅廢柴。」志琛更得戚嘲諷：「你哋以為陳在碩嗰一百億我填唔上咩，你哋真係太過睇小我」、「你有份幫我搬錢，但你哋唔知道螞蟻搬屋可以搬到幾多，一定唔係你諗得咁少，傻仔。」隨後更以手握孝賢罪證作威脅：「你要我死，我實搵你墊屍體」，更拍他面頰說：「你今生可以做我個仔已經好幸福，廢柴！」TVB 面對父親毫不留情嘅挑釁與羞辱，孝賢全程默不作聲，僅以充滿恨意與怒火嘅「眼神殺」交戲。在情緒累積至臨界點，孝賢終於失控，狠心將志琛推落樓梯。呢場兩父子鬥戲場口相當精彩，姜大衛將角色無情、老奸巨猾嘅性格演繹得淋漓盡致，而張智霖則憑簡短對白與眼神展現極具層次嘅內心戲，兩人高水準對戲獲網民一致好評。

談到呢場震撼嘅跌落樓梯戲，監製陳維冠透露姜大衛當初睇劇本時，曾主動提出想親身上陣，但鑑於樓梯彎位多且有安全風險，被他極力阻止。姜大衛接受訪問時親證此事：「睇劇本見到呢場戲確實想過自己做，但Joe極力阻止，加上後來睇到條樓梯真係太多彎，真係要搵專業替身。」

談到張智霖要親手推他，姜大衛笑言：「大家都拍咗咁多年戲，Chilam識得就力，我亦識得借力，紮好個馬步。」今次與張智霖和吳卓羲演兩父子，姜大衛對二人讚不絕口：「好多年前同佢哋合作係青靚白淨嘅靚仔，依家佢哋都變咗好成熟嘅男人，喺演戲上有好多唔同諗法提出，大家互相拋嚟拋去，令到出嚟嘅效果更好，所以大家合作得好開心。」