【娛樂新聞】陳康堤分手後首現身 認與黃澤林有共識分開 讚陳奕迅個唱破界限.陳康堤（Constance）同「香港網球一哥」Coleman黃澤林嘅戀情，隨住Coleman十月中喺網台節目中單方面直認「完咗啦」，半年情正式告吹。康堤自分手後今日首現身，同師姐Kiri T喺機場出席電台活動，更獲媽咪徐濠縈到場力撐。

談到分手後心情，康堤坦言一定會情緒低落，但問到分手原因就唔想回應。佢話自拍拖後雙方都係Focus喺自己度，又指分手係有共識，但同樣婉拒回答醞釀咗幾耐時間，希望外界畀啲空間佢哋，父母一直都支持佢。

提到分手前一、兩個星期先喺訪問上冧談Coleman，分手得咁突然，問到再見亦是朋友？康堤表示暫時分咗手。Coleman贏亞運男單冠軍後，見康堤都有點讚相關post，佢解釋係咁啱見到，好戥對方開心。惟Coleman率先宣布分手消息，事前有冇同康堤講聲？康堤就未有正面回應，只表示覺得好突然。問到依家ready好接受新戀情未？父母有冇再介紹對象？佢就話暫時冇，隨緣。

嚟緊農曆新年華納競投三個乾貨攤位，Kiri T同康堤被問到諗好賣咩未？康堤話可能會賣糖葱餅，Kiri T就話可以賣手袋。到時會唔會落場叫賣？康堤表示如果真係有落手搞，一定會落去，Kiri T更建議可以攞個喇叭唱住歌叫賣。

另外，陳奕迅（Eason）日前宣布將喺12月起假演藝學院舉行26場現場錄音音樂會，康堤讚Daddy永遠都打破界限挑戰自己，個構思好正。問到會唔會全勤撐Daddy？佢話要睇工作安排。講到有冇成身飛債？康堤搞笑爆料指close friend Kiri T有向佢落飛，Kiri T就承認「處理緊」。